23ಕ್ಕೂ ಹೆಚ್ಚು ಕಾಂಗ್ರೆಸ್ ಮುಖಂಡರು ಬಿಜೆಪಿ ಹೇಳ್ದಂಗೆ ಕೇಳ್ತಾರಾ? ರಾಹುಲ್ ಹೀಗ್ಯಾಕೆ ಅಂದ್ರು?

ನವದೆಹಲಿ: ಕಪಿಲ್ ಸಿಬಲ್, ಶಶಿ ತರೂರ್​​, ಗುಲಾಮ್ ನಬಿ ಆಜಾದ್​, ಪ್ರಥ್ವಿರಾಜ್ ಚೌವ್ಹಾಣ್, ವಿವೇಕ್ ಥಖಾ, ಆನಂದ್ ಶರ್ಮಾ.. ಕಾಂಗ್ರೆಸ್​ನ ಘಟನುಘಟಿ ನಾಯಕರಾದ ಇವರು ಬಿಜೆಪಿ ಹೇಳಿದ ಮಾತುಗಳನ್ನ ಕೇಳುತ್ತಾರಾ..? ಒಪ್ಪಿಕೊಳ್ಳುತ್ತಾರಾ? ಅನ್ನೋ ಹೊಸ ಚರ್ಚೆ ಶುರುವಾಗಿದೆ. ಇದಕ್ಕೆ ಕಾರಣ ರಾಹುಲ್ ಗಾಂಧಿ ಮಾಡಿರುವ ಆರೋಪ.

ಎಐಸಿಸಿ ಅಧ್ಯಕ್ಷ ಸ್ಥಾನದ ಆಯ್ಕೆ ಸಂಬಂಧ ಇಂದು ವಿಡಿಯೋ ಕಾನ್ಫರೆನ್ಸ್​ ಮೂಲಕ ಸಭೆ ನಡೆಯುತ್ತಿದೆ. ಈ ವೇಳೆ ಕಾಂಗ್ರೆಸ್​ ನಾಯಕತ್ವ ಹಾಗೂ ಪಕ್ಷದಲ್ಲಿ ಒಂದಿಷ್ಟು ಬದಲಾವಣೆಗಳನ್ನ ಆಗ್ರಹಿಸಿ ಕಪಿಲ್ ಸಿಬಲ್, ಶಶಿ ತರೂರ್​​ ಸೇರಿದಂತೆ 23ಕ್ಕೂ ಹೆಚ್ಚು ಮುಖಂಡರು ಪತ್ರ ಬರೆದಿದ್ದರು. ಈ ಪತ್ರವನ್ನ ಕೆಸಿ ವೇಣುಗೋಪಾಲ್ ಸಭೆಯಲ್ಲಿ ಓದಿ ಹೇಳಿದರು.

ಪತ್ರ ಬರೆದಿರುವ ವಿಚಾರಕ್ಕೆ ಸಿಕ್ಕಾಪಟ್ಟೆ ಗರಂ ಆಗಿರುವ ರಾಹುಲ್ ಗಾಂಧಿ, ಬಿಜೆಪಿ ನಾಯಕರ ಜೊತೆ ಒಪ್ಪಂದ ಮಾಡಿಕೊಂಡು ನಾಯಕತ್ವ ಬದಲಾವಣೆಗೆ ಪತ್ರ ಬರೆದಿದ್ದಾರೆ. ಪತ್ರ ಬರೆದಿರುವ ಸಂದರ್ಭ ಸರಿ ಇಲ್ಲ. ಯಾಕಂದ್ರೆ ನಾವು ಮಧ್ಯಪ್ರದೇಶ ಹಾಗೂ ರಾಜಸ್ಥಾನದಲ್ಲಿ ಸರ್ಕಾರ ಉಳಿಸಿಕೊಳ್ಳಲು ಪ್ರಯತ್ನ ಮಾಡುತ್ತಿದ್ದೇವೆ. ಅಲ್ಲದೇ ಅದೇ ವೇಳೆಗೆ ಸೋನಿಯಾ ಗಾಂಧಿ ಅನಾರೋಗ್ಯಕ್ಕೆ ಒಳಗಾಗಿದ್ದರು. ಬಿಜೆಪಿಯ ಜೊತೆ ಒಪ್ಪಂದ ಮಾಡಿಕೊಂಡು ಪತ್ರ ಬರೆದಿದ್ದಾರೆ ಅಂತಾ ರಾಹುಲ್ ಗಾಂಧಿ ನೇರವಾಗಿ ಆರೋಪ ಮಾಡಿದ್ದಾರೆ. ರಾಹುಲ್​ ಗಾಂಧಿ ಆರೋಪದಿಂದಾಗಿ ಸಭೆಯಲ್ಲಿ ಒಂದು ಕ್ಷಣ ಎಲ್ಲರೂ ಶಾಕ್​ಗೆ ಒಳಗಾದ್ರೂ ಎನ್ನಲಾಗಿದೆ.